AUTEUR ANONYME (?-?) Comme la vieille faint de estre courroussée

Comme la vieille faint de estre courroussée que pamphille soit la venu
et comme toute marrie va tenser a luy et le increper de estre venu
rompre son jardin.


Arte seram retro paulatin vir que reducit
Ad nos ingreditur quid modo cesso loqui.

Tien galathée m'amye chiere
Comme il est venu reculler
Par art la serrure en arriere
Il l'a bien faillu esbransler
Qui me fait tenir de parler
Quant vers nous je le voy venir
Qui esse qui me peult tenir
Que je ne luy voys dire injure
De m'avoir rompu ma serrure
Ha de fait je ne m'en puis taire
Et bref il en viendra murmure
Par le dieu ou je croy j'en jure
Ou il la me fera refaire

Cur furiose fores confringis pamphile nostras
Emptas namque meo, destruis ere tuo

Vien sa pamphille parle a moy
Et me dy la raison pourquoy
Rompu as furieusement
Les serrures comme je voy
De ce jardin est il a toy
Qui t'a donné ce hardement
Ne sçayt on pas certainement
Que les serrures que as gastées
J'ay de mon argent achatées
Pour quoy me les viens tu gaster
Pense d'aultres en rachater
Et que tost on me les reface
Ou j'en iray admonnester
Le juge que justice en face

Quid vis vel cujus venisti nuncius ad nos
Dicere si quid habes dic celer atque redi

Pourquoy viens tu en mon vergier
Ou quelle cause a nous te amaine
Ou de qui es tu messagier
Veulx tu faire du capitaine
Y viens tu pour nous faire peine
Et travail parle a moy beau sire
Se tu as quelque chose a dire
Dy le nous tost plus ne sejourne
Nous te orrons sans te contredire
Et incontinent t'en retourne