Joachim Du Bellay. (1522-1560) A son livre CVI

CVI
Qui niera (Gillebert) s'il ne veult resister
Au jugement commun, que le siege de Pierre
Qu'on peult dire à bon droit un Paradis en terre,
Aussi bien que le ciel, n'ait son grand Juppiter?
Les Grecz nous ont fait l'un sur Olympe habiter,
Dont souvent dessus nous ses fouldres il desserre:
L'autre du Vatican délasche son tonnerre,
Quand quelque Roy l'a fait contre luy despiter.
Du Juppiter celeste un Ganymede on vante,
Le Thusque Juppiter en a plus de cinquante:
L'un de Nectar s'enyvre, et l'autre de bon vin.
De l'aigle l'un et l'autre a la defense prise,
Mais l'un hait les tyrans, l'autre les favorise:
Le mortel en cecy n'est semblable au divin.