Joachim Du Bellay. (1522-1560) A son livre CX

CX
Quand mon Caraciol de leur prison desserre
Mars, les ventz, et l'hyver: une ardente fureur,
Une fiere tempeste, une tremblante horreur
Ames, ondes, humeurs, ard, renverse, et reserre.
Quand il luy plait aussi de renfermer la guerre,
Et l'orage, et le froid: une amoureuse ardeur,
Une longue bonasse, une doulce tiedeur
Brusle, appaise, et resoult les coeurs, l'onde, et la terre.
Ainsi la paix à Mars il oppose en un temps,
Le beautemps à l'orage, à l'hyver le printemps,
Comparant Paule quart, avec Jules troisieme.
Aussi ne furent onq' deux siecles plus divers,
Et ne se peult mieulx voir l'endroit par le revers,
Que mettant Jules tiers avec Paule quatrieme.