Joachim Du Bellay. (1522-1560) XXXI. Epitaphe d'un flambeau

XXXI. Epitaphe d'un flambeau
Passant, ce malheureux tumbeau
Couve les cendres d'un Flambeau
Nagueres pire que la flamme
Que songea la Troienne Dame,
Qui en effroyables abbois
Finit sa miserable voix.
Pire que la torche ennemie,
Qui dessus la ville endormie
Au milieu du choeur Orgien,
Trahissoit le mur Phrygien.
Pire que la lampe homicide
De celuy qui dedans Elide
Gallopant sur un pont d'airain
Contrefaisoit le Souverain.
Flambeau dont la flamme animee
Avoit toute France allumee,
Flambeau, ce croy-je, qui eust or
Embrazé tout le monde encor',
Si le ciel d'un soudain orage
N'eust esteinct l'ardeur de sa rage,
L'abysmant au centre odieux,
Avec les ennemis des Dieux:
Où ceste malheureuse torche,
Des Fureurs la plus fine emorche,
Sert encor de flambeau qui lui
Es mains des filles de la Nuict.
Flambeau plus noir que ceulx qu'on porte
Autour d'une charrongne morte:
Flambeau sorcier, flambeau fatal,
Pire que le tison natal
De Meleagre, et pire encores
Que le feu violeur, qui ores
Sacrilegement furieux
Saccage les temples des Dieux,
Or'attize au foyer des villes
Le brazier des guerres civiles.
Flambeau pire que tous ceulx-là,
Dont le Picard void ça et là,
Darder les flammes enragees
Sur ses bourgades saccagees.
Flambeau puant, flambeau fumeux,
Flambeau petillant, et gommeux,
Flambeau oingt de poix, et de soulphre
Emprunté du stygieux goulphre.
Flambeau secret, flambeau mutin,
Flambeau plus ardent au butin,
Qu'une fiere et cruelle armee
Au sac d'une ville enflammee.
Flambeau du soulphre plus amy
Que le feu forcenant parmy
La poictrine sicilienne,
Ou la poussière Thracienne:
Ny que le traict Olympien,
Dont le marteau Cyclopien
Arme la punissante dextre
A lancer les fouldres addextre:
Ny que le boulet furieux,
Dont l'Aleman industrieux
Par son canon espovantable
Rendit le tonnerre imitable:
Flambeau pire que le brandon
De la mere de Cupidon,
Flambeau, peur des chastes familles,
Flambeau, peste des jeunes filles,
Plus furieux que cestuy-là
Qui la soeur de Caune brula,
Ny que l'ardeur impétueuse
Qui rendit Myrrhe incestueuse,
Ny que le feu demesuré,
Qui d'un desir denaturé
Conceut en la Royne de Crete
Du taureau l'amour indiscrete.
Ce Flambeau, quand plus il ventoit,
D'autant plus sa force augmentoit,
Voyre fut de telle nature,
Qu'en l'onde il eust pris nourriture,
Tellement il estoit armé
D'un feu fatalement charmé.
Sa fureur pour un temps cachee
Sembloit quelque peu relaschee,
Mais depuis que d'un nouveau feu
A dextre esclairer on a veu
Juppiter dardant ses tempestes
Sur tant de miserables testes,
Ce Flambeau demy languissant
S'estoit faict plus fort et puissant:
Flambeau, dont les mortes flammesches
Maintenant allument les mesches
Qui esclairent au noir séjour,
Où jamais n'esclaire le jour.
Va donques Flambeau de Furie,
Va exercer ta seigneurie
Au plus creux du goulphre beant
Sur quelque fouldroyé géant,
Puis que jadis d'un tel college
Tu feus le Flambeau sacrilege.
Flambeau des enfers envoyé,
Flambeau par les cieulx fouldroyé,
Ores ta flamme est inutile:
Mais quiconques fut le Perile
Qui t'alluma dedans Paris,
Il eut faulte d'un Phalaris.