CHARLES D'ORLÉANS (1394–1465) LE DESSOUBZ DE LA RETENUE BALADE. XLI

BALADE.

Je ne vous puis, ne scay amer,
Ma Dame, tant que je vouldroye;
Car escript m'avez pour m'oster
Ennuy qui trop fort me guerroye:
Mon seul amy, mon bien, ma joye,
Cellui que sur tous amer veulx,
Je vous pry que soyez joyeux
En esperant que brief vous voye.

Je sens ces motz mon cueur percer
Si doulcement, que ne sauroye
Le confort, au vray, vous mander.
Que vostre messaige m'envoye;
Car vous dictes que querez voye
De venir vers moy, se m'aid Dieux,
Demander ne vouldroye mieulx.
En esperant que brief vous voye.

Et quant il vous plaist souhaidier
D'estre empres moy, où que je soye;
Par Dieu, nom pareille sans per,
C'est trop fait, se dire l'osoye;
Se suy je qui plus le devroye
Souhaidier de cueur tres soingneux,
C'est ce dont tant suis desireux,
En esperant que brief vous voye.