BALADE.
En acquictant nostre temps vers jeunesse,
Le nouvel an et la saison jolie,
Plains de plaisir et de toute liesse,
Qui chascun d'eulx chierement nous en prie;
Venuz sommes en ceste mommerie,
Belles, bonnes, plaisans et gracieuses,
Prestz de dancer, et faire chiere lye,
Pour resveiller voz pensées joyeuses.
Or bannissiez de vous toute peresse,
Ennuy, soussy avec merencolie,
Car froit yver, qui ne veult que rudesse,
Est desconfit, et convient qu'il s'enfuye;
Avril et May amainent doulce vie
Avec eulx; pour ce, soyez songneuses
De recevoir leur plaisant compaignie,
Pour resveillier voz pensées joyeuses.
Venus aussi, la tres noble Deesse,
Qui sur femmes doit avoir la maistrie,
Vous envoye de confort à largesse,
Et plaisance de grans biens enrichie,
En vous chargeant que, de vostre partie,
Vous acquictiez sans estre dangereuses;
Aidiez vous veult sans que point vous oublie,
Pour resveiller voz pensées joyeuses.